Milagros Otero toma posesión como Valedora do Pobo
miércoles, 2 de septiembre de 2015, 14:22
Milagros María Otero Parga, catedrática de Filosofía do Dereito da USC toma posesión como Valedora do Pobo, no Parlamento de Galicia, acompañada do Presidente da Xunta e outras autoridades.
Milagros Otero Parga tomou este mércores posesión como Valedora do Pobo, a primeira muller que ocupa este cargo de alta comisionada do Parlamento de Galicia.
O acto foi presidido na sede da Cámara polo seu titular, Pilar Rojo, e o da Xunta de Galicia, Alberto Núñez Feijóo, e a el asistiu tamén a Defensora do Pobo, Soledad Becerril, así como representantes doutras institucións como o Tribunal Superior, Consello de Contas, Consello de Relacións Laborais e das universidades galegas.
Entre as delegacións dos grupos parlamentarios non se atopaban os de Age e BNG, que non participaron no acordo entre PP e PSOE para cubrir outras vacantes de entes e institucións, como o propio Consello de Contas ou o consello de administración da CRTVG, aínda que si acudiu Carmen Iglesias, do Grupo Mixto.
Tamén asistiron representantes municipais, entre eles o alcalde da Coruña, Xulio Ferreiro, ou a tenente de alcalde de Santiago, María Rozas, dado que o rexedor compostelán, Martiño Noriega, reúnese esta tarde en Madrid coa ministra de Fomento, Ana Pastor.