​A Xunta aumenta as axudas complementarias ao programa Erasmus

A Consellería de Cultura, Educación e Ordenación Universitaria publicou este luns a convocatoria de axudas complementarias ao programa Erasmus e anunciou un incremento do importe, o mínimo pasa de 80 a 105 euros e o máximo de 150 a 175.

Segundo afirmou a Xunta nun comunicado, a convocatoria galega é "a mellor do Estado", pois non só aumentou a contía senón que tamén mantivo a duración máxima de nove meses da axuda, dúas máis que o tope establecido polo Organismo Autónomo Programas Educativos Europeos.

Para este fin, a administración autonómica vén de habilitar 1,4 millóns de euros, o mesmo que o curso anterior. A convocatoria, que pode consultarse no Diario Oficial de Galicia (DOG), vai dirixida ao alumnado o Sistema Universitario de Galicia (SUG) que participe durante o curso 2016/2017 no Programa Comunitario de Mobilidade Erasmus Estudo.

No curso 2015/2016 beneficiáronse desta axuda un total de 1.143 estudantes, así mesmo, a Xunta tamén convoca bolsas para os alumnos que realizan un programa de mobilidade en países extracomunitarios.

IMPORTE POR DESTINO E MEDIOS TELEMÁTICOS

Do mesmo xeito que as axudas europeas, as bolsas que reciben os universitarios beneficiados por esta convocatoria varían en función do país de destino. Así, aqueles que realicen a mobilidade en estados do primeiro grupo percibirán 175 euros ao mes, mentres que os do segundo grupo recibirán 145 e os do terceiro 105.

Outra novidade desta convocatoria é que por primeira vez a solicitude da axuda deberá realizarse por medios telemáticos, a través de calquera dos mecanismos de identificación admitidos pola sede da Xunta de Galicia.