​O incendio de Ribeira afecta ao parque natural de Corrubedo

Incendio en Corrubedo. //Foto: @frenteoza2005 twitter

O incendio forestal declarado en Ribeira chegou ao parque natural das dunas de Corrubedo. O lume, estabilizado, xa arrasou unhas 70 hectáreas, afecta a unha zona de piñeirais que está nas proximidades do centro de interpretación das dunas, segundo afirmou este luns o alcalde, Manuel Ruiz Rivas. Son 26 hectáreas dentro do parque natural.

"A tal hora --os efectivos-- deben de estar a facer os labores para que o lume non se reproduza", comentou. Así, o primeiro edil indicou que os equipos contra incendios están "a punto" de "liquidar totalmente" o traballo para controlar as chamas, que se iniciaron "de noite" e das que non dubidou en sinalar a súa "intencionalidade".

Sobre o motivo polo que cre que este incendio puido ser provocado, Ruiz Rivas lamentou que "estas persoas", polos pirómanos, son "enfermos que non miden as consecuencias". A este respecto, advertiu de que houbo que desaloxar tres vivendas no lugar de Castro, e avisou de que puideron verse afectados "bens persoais".

Con todo, valorou a tarefa de "importantes medios" que "lograron concentrar" o lume "para o seu control", e apuntou que tras a participación de dous helicópteros e dous avións "practicamente está a piques de liquidarse totalmente" a situación.

Tamén permanece controlado outro foco separado pero localizado integramente dentro do Parque Natural das Dunas de Corrubedo. Este localízase na parroquia de Olveira e comezou ás 00:58 horas da madrugada. 

Segundo as primeiras estimacións, o lume afectou a unha superficie de 13 hectáreas, das cales 4 son arboradas e o resto de monte raso. Na súa extinción traballan 3 axentes, 4 brigadas e 3 motobombas. Así pois, a superficie afectada dentro deste espazo protexido é dun total de 39 hectáreas.