​Caballero duplicou a cifra de asesores

A portavoz do Partido Popular no Concello de Vigo, Elena Muñoz, censurou que o alcalde olívico, Abel Caballero, ten 14 asesores, "o dobre que na anterior lexislatura", e no próximo pleno pretende dar "un paso máis para crear unha praza de adxunto ao director de gabinete".

Muñoz considerou esta cifra "obscena, insólita e desproporcionada" e sinalou que este "despropósito" supón "un custo de 400.000 euros para todos os vigueses". "Contrasta co déficit de funcionarios que presenta o Concello en áreas tan importantes como Política Social", apuntou, antes de estender a súa crítica ao Goberno da Deputación de Pontevedra.

Segundo dixo, todo isto é "un fiel reflexo" da maneira que ten Caballero "de entender a política, máis pendente da publicidade e a propaganda que da xestión diaria e o impulso de proxectos", posto que, engadiu "a xestión é un desastre" e "as iniciativas importantes da cidade están totalmente paralizadas".