Os prexudicados polos miguelianos buscan "reparar o dano moral"

Os familiares vinculados á 'Orde dos miguelianos' encaran o xuízo contra os líderes da orde coa intención de "reparar o dano moral das vítimas" e que as persoas que cometesen delitos penais respondan ante a Xustiza. 

Así o declarou a letrada que defende aos familiares dos afectados, Ana Reguera, que confirmou que as vítimas se atopan "nun estado delicado", despois de que varios feitos delictivos afectaran a unha serie de mozas. 

Hai que recordar que o líder da orde, Feliciano Miguel Rosendo, está sendo investigado por un suposto delito de abuso sexual, ademais dos delitos contra a Facenda Pública e asociación ilícita polos que están investigadas entre 11 e 14 persoas. 

Hoxe arrincaron as declaracións coas testemuñas de dous prexudicados, sobre os que a letrada non quixo dar detalles. "Queren preservar a súa identidade, levalo da maneira máis discreta posible e sobre todo de fronte tamén aos fillos, que teñen moitas cousas que falar con eles e temas moi persoais e íntimos que non queren que saian á luz". "Non queremos entrar nun debate de televisións, queremos levalo na intimidade", rematou.

ORDE DE SAN MIGUEL

O Tribunal Superior de Xustiza de Galicia (TSXG) confirmou que a investigación se segue polos supostos delitos de asociación ilícita, delito contra a Facenda Pública e, no caso do fundador da Orde e Mandato de San Miguel, Feliciano Miguel Rosendo, por eses delitos e polo de abuso sexual.

Ademais do líder, hai polo menos outras 10 persoas investigadas, entre as que se atopan a súa man dereita, Marta Paz --ambos foron detidos o 11 de decembro de 2014 en Madrid, tras o que el foi enviado a prisión, tres parellas, un sacerdote e outra persoa cuxa identidade non transcendeu.

A Orde chegou a ter uns 400 seguidores no seu momento álxido e tiña o seu centro de operacións nun chalé en Santa María de Oia (Pontevedra). Na primavera de 2014 os seus integrantes foron expulsados polas autoridades eclesiásticas, e un grupo reducido trasladouse a dúas sedes en Madrid (Collado Villalba e El Escorial). Días despois das detencións de Rosendo e Marta Paz, o bispo de Tui-Vigo, Luís Quinteiro Fiuza, asinou o decreto de supresión da Orde e Mandato.