Algo está fallando co prezo do leite

A venta de leite por debaixo dos custes de produción non é ningunha novidade. De pouco serviron as manifestacións, tractoradas, compromisos e medidas políticas adoptadas ata agora. A crise dos gandeiros galegos non dá respiro e cada día son máis as explotacións que se ven obrigadas a botar o peche.

Este luns a conselleira de Medio Rural, Ángeles Vázquez, defendeu ante mandatarios da Unión Europea en Bruselas a necesidade de subir os prezos e controlar de forma "férrea" os mercados para que sexa imposible vender con perdas. Neste senso, admitiu que "algo está fallando", dado que o paquete de medidas posto en marcha por Europa en setembro do ano pasado "non está funcionando" e o mercado está "estrangulando" ao sector. 

A conselleira trasladaralle á ministra de agricultura, Isabel García Tejerina, a necesidade de defender unha subida de prezos "fundamental" no Consello de ministros de Agricultura da UE en marzo. Pero a postura española non será fácil de defender. No pasado mes de setembro España xa pediu algo parecido co apoio de Italia, Portugal e Francia, pero a UE rexeitou regular o mercado considerando que "perxudicaría á competitividade". 

Por iso parece difícil confiar en que a solución chegue dende Europa. Dende a Plataforma pola Defensa do Sector Lácteo reuníronse esta maña coa Alternativa Galega de Esquerda, trasladándolles segundo o voceiro de AGE, Antón Sánchez, a "situación de extrema gravidade" na que se atopan os gandeiros, que non poden agardar moito máis por unha solución. 

Antón Sánchez denunciou que non se estaban a respetar acordos fundamentais como a indicación da orixe do producto e a transparentación da cadea productiva: "non se sabe canto paga a distribución e canto paga a industria". Acusa á Xunta de fallar na súa tarefa de "vixiar as prácticas fraudulentas" por parte da industria e reclaman un acordo con medidas "moi urxentes, moi concretas", que esperan poder abordar no pleno parlamentario desta semana.