O sector lácteo galego levanta o cerco ás industrias

Saída dun camión da planta de Leite Río, tras levantar o bloqueo dos gandeiros 

Os gandeiros galegos decidiron levantar o bloqueo ás industrias lácteas que manteñen dende hai cinco días e volverán así a entregar leite, despois de semanas de mobilizacións en reivindicación de prezos xustos. Así acordouno este mércores por “unanimidade” a Plataforma en Defensa do Sector Lácteo segundo informaron fontes desta, cunha decisión coa que se pon fin á folga de entregas, pois os gandeiros confían en que haxa unha suba dos prezos que reciben polo leite tras xestos de distribuidoras e industrias.

Durante este bloqueo tiráronse máis de 30 millóns de litros de leite, segundo estimacións do sector e producíronse perdas millonarias. Así mesmo, a plataforma avisa a industrias e distribucións de que estarán vixiantes.

Distribuidoras como Mercadona e Vegalsa-Eroski anunciaron que subirán dous céntimos o litro de leite co fin de que se repercuta nos produtores, ao igual que industrias como Leite Celta comprometéronse a retirar contratos á baixa.

Deste modo, prevén que o Ministerio de Agricultura convoque unha nova reunión para o próximo 22 de setembro na que se poida asinar un acordo que achegue estabilidade ao sector a partir do 1 de outubro. Dende Galicia fixéronse chegar alegacións ao borrador que reclaman garantías para prezos sostibles e que haxa sancións por incumprimentos.

SEMANAS DE MOBILIZACIÓNS

Tras unha multitudinaria manifestación en Santiago en xullo, durante o mes de agosto sucedéronse diversas tractoradas comarcais en localidades como Santa Comba e Vilalba. Foi o 4 de setembro cando os gandeiros iniciaron unha protesta en Lugo con tractores que se prolongou durante unha semana arredor da Rolda da Muralla.

Posteriormente, entre o 7 e o 11 de setembro, as protestas dos produtores tomaron as rúas de Santiago, onde bloquearon arterias principais antes de deixar a cidade para iniciar un bloqueo ás industrias o sábado 12 de setembro ao que agora se pon fin. Todo iso, mentres os gandeiros de Lugo se desmarcaban deste agravamento das protestas, ao igual que Asaja Galicia e Agaca.