Feijóo, sobre o salto á política estatal: "Teño un contrato con Galicia ata 2020"
martes, 20 de diciembre de 2016, 17:46
O presidente da Xunta, Alberto Núñez Feijóo, reiterou que cumprirá "o seu contrato cos galegos ata 2020" en relación á posibilidade de que dea un salto á política estatal en vista aos bos resultados obtidos nas últimas eleccións autonómicas.
A preguntas dos asistentes a unha conferencia do titular do Executivo galego sobre 'A estabilidade institucional: Un valor económico e social', organizada polo Banco Santander e La Voz de Galicia, Feijóo insistiu, en liña co discurso mantido tras a súa vitoria nas últimas eleccións autonómicas, en que subscribiu "un contrato cos galegos" e que o vai "cumprir".
"Para min, ser presidente de Galicia é máis importante que os oito anos anteriores", apostilou en alusión ao actual mandato e o feito de que esta sexa a única autonomía con maioría absoluta en España. Isto, dixo, obrígame a ter "máis dedicación e máis determinación".
En alusión á oposición, asegurou que a algúns "lles gustaría que se fose". "Pero non me vou ir", reiterou. Con todo, sinalou que "no que poida" traballará para "axudar" ao Executivo central. "É a mellor opción que ten España", dixo tamén, en referencia ao goberno de Mariano Rajoy.