Traballadores e usuarios do CHUVI recibiron "máis de 1.600 multas" de estacionamento
sábado, 3 de diciembre de 2016, 11:35
Traballadores e usuarios participaron deste venres nunha concentración convocada pola xunta de persoal do Complexo Hospitalario Universitario de Vigo (Chuvi) para esixir a mellora do aparcadoiro e o tráfico na contorna do Hospital Álvaro Cunqueiro.
En concreto, reclaman que se ordene a circulación dos vehículos tanto nas inmediacións do centro como nos accesos ao aparcadoiro, así como que se habiliten máis prazas de estacionamento en superficie e que o aparcadoiro de urxencias estea a disposición dos empregados.
A xunta de persoal tamén aproveitou esta protesta para denunciar que traballadores e usuarios do hospital recibiron "máis de 1.600 multas" de 200 euros por estacionar na zona, "a pesar de que o alcalde repetía constantemente que só se sancionaría a aqueles vehículos que obstaculizasen o tráfico".