O HAC atendeu 250 bebés prematuros, a maioría 'oitomesinos'
jueves, 17 de noviembre de 2016, 18:37
Con motivo do Día Mundial do Neno Prematuro, as instalacións da Unidade de Neonatoloxía do Hospital Álvaro Cunqueiro (HAC), onde se atenderon a uns 250 bebés destas características nun ano, luciron este xoves unha cara distinta, grazas á decoración instalada por iniciativa do persoal de enfermería.
A media global de nacementos prematuros está ao redor dun de cada dez, aínda que en Vigo é lixeiramente inferior (un de cada trece), e a maioría dos bebés nados antes de que a nai cumpra o tempo de xestación son 'oitomesinos'.
O un por cento dos bebés prematuros da área de Vigo nacen con tan só 32 semanas de xestación, e o bebé máis pequeno nado este ano e atendido na Unidade de Neonatoloxía do HAC pesou 400 gramos ao nacer, e chegou a baixar ata os 380 gramos de peso nos seus primeiros días de vida.
Este servizo do Álvaro Cunqueiro conta con máis de 40 incubadoras, das que 16 están na Unidade de Coidados Intensivos. As instalacións do novo hospital, máis amplas, permiten aos pais estar máis tempo en contacto cos seus bebés "e esa interacción é moi boa", segundo a responsable de Neonatología, Ana Concheiro.
Ademais, as nais teñen á súa disposición unha sala específica para que poidan extraerse o leite que logo se administrará aos seus fillos. Por estas cuestións, esta unidade é unha das mellor valoradas polos usuarios do HAC.