As vítimas do Alvia rexistran a solicitude de reunión co ministro de Fomento
martes, 8 de noviembre de 2016, 10:50
As vítimas do accidente do tren Alvia que descarrilou en Angrois, en Santiago, en 2013, rexistraron a petición de reunión co novo ministro de Fomento, Íñigo de la Serna, despois de que o pasado xullo, como alcalde de Santander polo Partido Popular, votase a favor de pedir ao Goberno unha comisión de investigación sobre o sinistro.
Deste xeito, a Asociación Plataforma Vítimas Alvia 04155 pide ao ministro un encontro co fin de que explique "como vai facer efectivo o apoio expreso" que lles ofreceu.
A proposta municipal, aprobada o 29 de xullo polo entón alcalde, solicitaba ao Goberno que "encargue a unha comisión de expertos e técnicos independentes a investigación do ocorrido", así como a "apertura dunha comisión de investigación en sede parlamentaria para esclarecer posibles responsabilidades políticas".
"A creación destas dúas comisións é imprescindible para lograr a verdade e a xustiza pola que levamos loitando máis de tres anos. Chegou a hora de que así podamos descansar e non se nos xere máis dor", sinalan as vítimas.
De tal forma, as vítimas esperan que o ministro "manteña o seu compromiso" coa verdade e a súa "boa actitude" con respecto ás súas reclamacións.