Rocío de Frutos mantivo o 'non' e Cancela acatou a abstención
domingo, 30 de octubre de 2016, 10:56
A deputada ourensá Rocío de Frutos confirmou o seu "non" a Mariano Rajoy no Congreso durante a sesión de investidura celebrada este sábado, rompendo tal e como anunciara a disciplina de voto do seu partido que acordou absterse durante o Comité Federal celebrado o pasado domingo.
Momentos antes de iniciarse a sesión, a deputada galega asegurara que mantería a súa 'non' "ata o final" en cumprimento da promesa realizada aos cidadáns, aínda que "de momento" non deixará o seu escano no Congreso tal e como fixo o exsecretario xeral do PSOE, Pedro Sánchez.
O resto de deputados galegos do PSOE, a presidenta da xestora do PSdeG, Pilar Cancela, o deputado por Coruña Ricardo García, a deputada por Lugo Margarita Pérez Herraiz, o parlamentario por Pontevedra Guillermo Meijón e a deputada Dores Galovart, sumáronse á abstención cumprindo a disciplina de voto da formación socialista.
"ACÁTOA PERO NON A COMPARTO"
Cancela explicou, en declaracións a Europa Press, que "sempre" defendeu "a posición do non", achacando a súa postura á "responsabilidade" que mantén como "presidenta da xestora" dos socialistas galegos, que lle obriga a "acatar e facer velar polo cumprimento das normas e resolucións". "Acátoa pero non a comparto", insistiu.
"A partir de aí", realizou "un chamamento" á dirección provisional do PSOE a que convoque primarias e congreso "xa", dado que "é a militancia a que ten que ser escoitada" e "a fractura do pode seguir profundándose". "Se queremos coser, a única maneira é que fale a militancia", reiterou.
Preguntada pola decisión de 15 deputados socialistas de votar 'non' a Rajoy, Cancela considerou que a xestora do PSOE "ten que tentar reconducir a situación", ao que "non axudará o feito de impoñer sancións" ou "medidas drásticas" como a expulsión da formación.
Tamén trasladou o seu "respecto" polo voto negativo da súa compañeira Rocío de Frutos dado que "non ten ningunha responsabilidade orgánica" e sempre "mantivo a posición que defendeu" durante a sesión de investidura deste sábado.
QUINCE SOCIALISTAS
Un total de 15 deputados do Grupo Socialista romperon finalmente a disciplina de voto e mantiveron o seu 'non' ao candidato do PP á Presidencia do Goberno, Mariano Rajoy, desatendendo o mandato do Comité Federal do PSOE que decidiu a abstención que permite a investidura do líder dos 'populares'.