Galicia rexistrou en 2015 a maior cifra do século de mortes por violencia machista
jueves, 6 de octubre de 2016, 18:22
O fiscal superior de Galicia, Fernando Suanzes, advertiu de que no ano 2015 rexistráronse en Galicia 19 homicidios, dos cales 8 foron por violencia de xénero, "a maior cifra de mortes por esta causa no que vai de século".
Así o manifestou durante o seu discurso na apertura do ano xudicial en Galicia, na sede do Tribunal Superior de Xustiza de Galicia (TSXG), que contou coa presenza do delegado do Goberno, Santiago Villanueva e o vicepresidente en funcións da Xunta, Alfonso Rueda, entre outras moitas personalidades políticas e sociais.
Suanzes centrou a súa intervención en dar conta da Memoria da Fiscalia da Comunidade Autónoma, que reflicte que no ano 2015 tramitáronse en Galicia un total de 215.701 procedementos penais, un 4% menos que no ano anterior.
Sobre a criminalidade, ademais dos datos referidos aos homicidios, o pasado ano baixaron un 3% os delitos incoados por tráfico de drogas, un 12% as substraccións e un 19% os relacionados coa seguridade viaria; mentres que se incrementaron un 14% os delitos incoados por agresión sexual.
En canto aos delitos de corrupción, diminuíron un 32%, cun total de 195 procedementos incoados por esta causa e 22 sentenzas. En calquera caso, o fiscal superior chamou a "non baixar a garda" nesta cuestión, que se sitúa como o segundo problema, despois do paro, que máis inquieta aos españois.
ACURTAR PRAZOS
Fernando Suanzes tamén aproveitou a súa intervención para referirse ao proceso de implantación das novas tecnoloxías no ámbito da xustiza, unha tarefa na que "aínda queda moito por facer".
Así mesmo, avogou por poñer en práctica medidas que simplifiquen e axuden a aliviar a sobredimensión actual de procedementos nas administracións xudiciais. "Aínda hai un amplo espazo para explorar novas fórmulas que permitan recortar os prazos de instrución e gañar en eficiencia", afirmou.
Pola súa banda, o presidente do TSXG, Miguel Ángel Cadeas, destacou no seu discurso a "independencia responsable" dos xuíces e chamou a acometer as "reformas" anunciadas no ámbito da xustiza.
REFORMA DA XUSTIZA
"É inherente a un Estado democrático un poder xudicial independente, que é garantía dos cidadáns", dixo o presidente, quen tamén insistiu en que esta independencia está ligada á responsabilidade que leva.
Cadeas deixou tamén constancia "da necesidade inaprazable de acometer as reformas que veñen anunciando desde hai tempo para lograr unha xustiza debidamente eficiente e moderna".
Tamén concretou que esta reforma "máis ou menos integral da Administración de Xustiza" debe pasar por "a reordenación territorial, funcional e competencial", así como por unha "planta e demarcación xudicial máis racional e eficiente, coas oportunas infraestruturas e ferramentas tecnolóxicas".
O presidente do TSXG tamén repasou no seu discurso os principais datos da memoria xudicial do ano pasado. Puxo de relevo que os órganos xudiciais da comunidade resolveron en 2015 case 453.000 asuntos, o que unido a que o número de causas ingresadas descendeu un 6%, permitiu que a pendencia diminuíse un 10%.