Fernán Vello tacha de "ignorante" ao pobo galego e acaba pedindo desculpas
martes, 27 de septiembre de 2016, 14:28
O deputado de En Marea por Lugo, Miguel Anxo Fernán Vello, tivo que rectificar e pedir desculpas tras tachar de "ignorante" ao pobo galego polos resultados das eleccións galegas do pasado domingo, nas que o PP de Alberto Núñez Feijóo revalidou a maioría absoluta.
"Pobo estraño o noso: "escravos" que votan ao amo, ao 'señorito', ao cacique, ao que manda, aos de sempre. Pobo alienado e ignorante", escribiu o deputado na súa conta persoal da rede social Twitter.
Fernán Vello, un dos deputados de En Marea que ao tomar posesión proclamou que é "o pobo quen máis ordena", retirou a súa mensaxe horas despois, cando desde o PP galego xa lle pedían a dimisión.
"Rectificar é preciso --publicou a continuación--. En 'quente' podemos expresar ideas desacertadas. O pobo falou e ten todo o meu respecto. As miñas desculpas se ofendín".
PETICIÓN DE DIMISIÓN
A portavoz adxunta do Grupo Popular no Congreso e deputada pola Coruña, Marta González, esixiu este martes ao deputado de En Marea Miguel Anxo Fernán Vello que dea "explicacións e desculpas serias e contundentes" por tachar de "ignorante" ao pobo galego polos resultados das eleccións galegas do domingo, e se non, que presente a súa dimisión e deixe a súa acta.
"A pesar de saber que el publicou outro 'tweet' semidisculpándose, consideramos que esas desculpas non son suficientes e que realmente ofendeu gravemente ao pobo galego que nos elixiu a todos os que estamos aquí, a el tamén como deputado, e votou maioritariamente ao PP nas eleccións autonómicas", criticou.
Por iso, a portavoz 'popular' defendeu que "se non dá unhas explicacións e unhas desculpas serias e contundentes, non está capacitado para exercer esta representación que lle deron os votos, e por tanto debería dimitir e deixar o seu posto a alguén máis capacitado".
Pola súa banda, o deputado de En Marea considera "ridículo" que o PP, onde "hai unha putrefacción xeral e non dimite ninguén", reclamase que deixe o seu escano por un tuit "desafortunado" que xa retirou e polo que xa pediu desculpas.