O TS decidirá sobre os recursos dos pais de Asunta
miércoles, 21 de septiembre de 2016, 09:58
O Tribunal Supremo (TS) analiza este mércores os recursos de casación presentados polos pais de Asunta Basterra, Alfonso Basterra e Rosario Porto, contra a condena de 18 anos de prisión ratificada polo Tribunal Superior de Xustiza de Galicia polo asasinato da súa filla, unha deliberación que se produce coincidindo co terceiro aniversario da morte da nena, ocorrida o 21 de setembro de 2013.
Os recursos sobre os que deberá fallar o Supremo foron presentados polas defensas dos condenados despois de que o TSXG ratificase a condena a 18 anos de prisión para cada un dos pais que determinou a Audiencia Provincial da Coruña polo asasinato da súa filla Asunta.
Cando se cumpren exactamente tres anos do asasinato da menor, o TS realizará unha deliberación a porta pechada sobre estes recursos, da que se coñecerá o fallo, tras o que se redactará unha sentenza en base ao mesmo.
No mes de marzo, o TSXG confirmou a condena aos pais de Asunta emitida pola Audiencia Provincial nun auto no que se avalaban os feitos recolleitos como probados no auto orixinal do xuíz Jorge Cid Carballo, excepto no punto que se refire á participación directa de Alfonso Basterra na morte da nena.
MODIFICACIÓN SEN ALTERACIÓN DE PENA
Así, o alto tribunal galego introduciu unha modificación nos feitos probados segundo a cal foi Rosario Porto a única culpable de asfixiar á súa filla Asunta, aínda que determinou que isto o fixo "en execución do plan preconcibido" con Alfonso Basterra para acabar coa vida da menor.
Aínda tendo en conta isto, e tras desestimar as irregularidades alegadas polas defensas dos pais, o TSXG indicou que a pena que cabía impoñer a Basterra por este caso era a mesma que a Porto, 18 anos de prisión por asasinato con agravante de parentesco e abuso de superioridade.
Agora deberá ser o Supremo o que determine se esta sentenza está correctamente fundamentada ou se, como alegan as defensas dos pais, a condena carecía de probas.
Asunta Basterra Porto, de 13 anos, morreu asfixiada o 21 de setembro de 2013, aínda que o seu corpo, abandonado nunha pista forestal nas proximidades de Santiago de Compostela, non foi localizado ata a madrugada do día 22. A investigación posterior, que terminou co encarceramento dos seus pais adoptivos, determinou que, ademais, a menor consumira antes da súa morte e nos meses previos distintas cantidades de 'lorazepam', a última en rango "tóxico".