Excarceran unha persoa do seu coche por un accidente en Vilalba
domingo, 28 de agosto de 2016, 11:27
Os Bombeiros excarceraron a unha persoa que quedou atrapada no interior do vehículo no que viaxaba cando circulaba pola rotonda da saída da A-8, na ligazón coa Autovía de Ferrol, á altura do termo municipal de Vilalba.
Ademais, segundo precisou o CAE 112 Galicia, outro dos ocupantes do vehículo tamén resultou ferido. O accidente tivo lugar a escasos minutos das 19,00 horas deste sábado. Foi a esa hora cando un alertante pediu axuda ao CAE 112 que, de inmediato, pasou aviso a Urxencias Médicas e aos Bombeiros.
Igualmente, o persoal do 112 Galicia solicitou a colaboración dos axentes de Tráfico e de Protección Civil. Os servizos sanitarios precisaron de dúas ambulancias para trasladar aos feridos ao centro hospitalario de referencia.