A única farmacia de Folgoso do Courel está "desabastecida"
martes, 16 de agosto de 2016, 13:47
A alcaldesa de Fogoso do Courel, a popular Lola Castro, advertiu este martes de que a "situación é lamentable" porque a única farmacia do concello se atopa "desabastecida", para un censo por encima dos 1.400 habitantes.
Isto provoca que os veciños, cunha poboación "moi" envellecida, se teñan que trasladar a farmacias dos concellos limítrofes, ou ben Pedrafita ou ben Quiroga.
A rexedora precisou que "os propietarios dixeron" que ían tentar emendalo e "negociar co banco para tentar solucionar o problema, pero parece que non é posible". "Chegou un momento en que tivo que intervir a Xunta, mandamos escritos á Xunta e esa farmacia é a máis importante de Folgoso", explicou.
Respecto diso, apuntou que "no outro núcleo en Seoane (do Courel) hai un botiquín e no botiquín vaise poñer a actuar xa a Xunta". "En setembro vai estar o tema solucionado, co botiquín pódese abastecer o outro núcleo importante. O da farmacia é máis difícil porque hai unha concesión e é máis complicado", puntualizou.
Ademais, destacou que, "por desgraza", a poboación está "envellecida e moitos veciños sen coche, polo que teñen que coller un taxi para ir ao médico e outro para ir a Quiroga ou a Pedrafita, que son os municipios coas farmacias máis próximas".