A Xunta defende o trato que se dá aos pacientes oncolóxicos
sábado, 6 de agosto de 2016, 12:32
A Xunta replicou ao BNG, que denunciou a "crueldade inaceptable" da situación que viven decenas de enfermos oncolóxicos que reciben os seus tratamentos no hospital Álvaro Cunqueiro (HAC) de Vigo, que o sistema polo que son atendidos é "similar ao da maioría de hospitais hoxe en día".
En concreto, a través dun comunicado, detallou que no hospital de día realízase o denominado "acto único", polo que ao paciente se lle realiza a analítica, as probas radiolóxicas se son necesarias, a consulta co facultativo e o tratamento o mesmo día.
Deste xeito, "evítanse desprazamentos dos pacientes ao hospital durante varios días, como sucedía hai anos", defendeu o Goberno galego, para o que o tempo que están estes pacientes están no hospital é "adecuado".
Así pois, cualificou de "rotundamente falsas" as acusacións do BNG neste sentido, así como as denuncias de que os pacientes non reciben auga nin alimentos durante a súa estancia. "Auga, zumes e alimentos enerxéticos están á súa disposición (...). Calquera manifestación en sentido contrario é unha terxiversación", sentenciou.