A área Metropolitana de Vigo nace coa intención de se expandir

Redacción

martes, 12 de julio de 2016, 17:15

Todos os grupos con representación na Cámara galega votaron a favor da nova lei da área metropolitana coa que se dotará Vigo. Incluso AGE, que se abstivo no trámite parlamentario previo no Pazo do Hórreo, deu o 'si' tras o "avance do PP" no diálogo ao aceptar unha das súas emendas sobre cohesión territorial e social.

Na votación definitiva, PPdeG, PSdeG, AGE, BNG e Grupo Mixto apoiaron un texto cuxo "consenso" nace --remarcaron os distintos grupos-- do ámbito local e do traballo dos 14 concellos que integran a área.

Con "pasos adiante" en cuestións como a gobernanza e o transporte metropolitano, destacadas por varios grupos, o debate das emendas transcorreu con normalidade. Nel, Chelo Martínez (Grupo Mixto) valorou o acordo e manifestou o seu desexo de que permita "consolidar" a área metropolitana e "mellorar a calidade de vida" dos vigueses.

Pola súa banda, Carme Adán (BNG) destacou o "paso adiante" dado nesta xornada, pero urxiu unha "maior participación cidadá" no seo da área, mentres que o parlamentario de AGE Xabier Ron apelou a ver as normas desde unha perspectiva "global" e non só localista, e defendeu o traballo do seu Grupo para tentar mellorala no trámite parlamentario. Finalmente, despois dunha primeira intervención na que relatou varias emendas "importantes" que, á súa entender, quedaban fóra da norma, accedeu ao 'si' unha vez que o popular Javier Dorado deu por feito que se aceptaría a súa alegación relativa á cohesión territorial e social.

CONFRONTACIÓN PSOE-PP

Con todo, durante o debate si confrontaron con dureza o portavoz do PSdeG no debate, Abel Losada, e Dorado, quen acusou mutuamente ao partido do outro de bloquear un proxecto no que, en palabras do popular, traballaron "moitas persoas desde hai 80 anos".

E é que Losada botara en cara ao PPdeG "impoñer" unha norma previa que aspiraba a "gobernar Vigo desde fóra" e só cambiar de actitude tras o "aviso" recibido nas urnas nas últimas eleccións municipais, cando os vigueses decidiron incrementar o seu apoio ao alcalde, Abel Caballero, "cun 17-7" (17 edís socialistas por sete populares).

Fronte a iso, Dorado reivindicou o traballo conxunto e, tras criticar que Losada "aproveitase" este debate para buscar un oco "na lista" do PSdeG para as autonómicas "gañando méritos ante o seu amado líder" (en alusión a Caballero, presente no hemiciclo), ironizou coas "medallas" que pretende "colgarse" o PSOE --lendo titulares críticos de membros do partido sobre o anterior proxecto da área--.

RUEDA APELA AO "ESPÍRITO DE CONSENSO"

Pola súa banda, o vicepresidente da Xunta, Alfonso Rueda, fixo uso da quenda de peche ao que pode optar o Goberno tras o debate para remarcar que este é "un día para celebrar", apelar a que o "espírito de consenso" continúe para poñer en marcha a área metropolitana e lanzar un aviso ao PSdeG: que a correlación na Cámara galega é "41-18" (41 deputados do PP e 18 do PSdeG).

Non en balde, o tamén presidente do PP de Pontevedra defendeu que o paso dado este martes non é "un punto e final", senón que "se abren moitas posibilidades de cooperación" entre os municipios que conforman a área. Como exemplo, celebrou a incorporación de Vigo á área metropolitana e insistiu no "consenso" agora que vén "o máis difícil": poñer a andar o proxecto. "Espero que todos esteamos á altura", destacou Rueda.

OBXECTIVO: CHEGAR A 30 MUNICIPIOS

O alcalde da cidade olívica, Abel Caballero, celebrou que o Parlamento aprobe por unanimidade a lei da área metropolitana de Vigo. Caballero, que acudiu con outros alcaldes da área ao debate, augurou, acompañado de dirixentes socialistas, que esta área "acabará tendo 28 ou 29 municipios" porque, neste momento, xa hai a petición "dun número significativo" de concellos que queren entrar. "E a ampliación vai ser a primeira decisión que se tome na asemblea da área metropolitana", avanzou.

Así, apuntou que, "deica pouco", a Xunta terá sobre a mesa a demanda dun decreto para a ampliación deste proxecto "ata os 28, 29 ou 30 municipios", que é a contorna "na que se vai estar".

COMPETENCIAS DE "ORDENACIÓN" DA SANIDADE

"Son 600.000 habitantes e é unha das grandes áreas de Europa, é unha área transfronteiriza e, por tanto, da maior importancia, con competencias en ordenación do territorio, en políticas sociais, en políticas económicas e de cada ámbito sectorial", defendeu, á vez que avanzou a súa intención de "reclamar máis".

"Eu reclamarei competencias de ordenación da sanidade. Non me refiro a competencias de sanidade, refírome á ordenación, a que, cando hai un hospital podamos arbitrar cuestións tales como o acceso ou as formas de organización", aclarou, "inmensamente feliz" polo proxecto aprobado este martes.