Máis dun millón e medio para os asesores da Xunta
miércoles, 9 de marzo de 2016, 09:33
A Xunta acaba de activar o seu portal de transparencia e bo goberno, unha páxina que nos ten permitido acceder a datos que ata agora descoñeciamos, como os soldos dos asesores do goberno e demais persoal de apoio.
Descubrimos que a Xunta conta con un total de 53 asesores, que se levan un total de 1,6 millóns de euros cada ano, tocando a unha media duns 30.000 euros por cabeza. Se sumamos os soldos de xefes de gabinete, xefes de prensa e persoal de apoio obtemos un total de 4,7 millóns de euros. Esta cifra supón, segundo a Xunta, un 35% menos do que se gastaba en 2008, cando segundo indican o persoal destas categorías cobraba 7,2 millóns.
O portal de transparencia tamén detalla os 65 contratos de dirección ligados aos entes da Xunta, con retribucións que varían entre os 33.518 euros do director-xerente da Fundación Deporte Galego, Javier Rico, e os 67.848 do director xeral da CRTVG, Alfonso Sánchez Izquierdo.
OS SINDICATOS LÉVANSE MÁIS DE 10 MILLÓNS
No portal de transparencia tamén se detallan os gastos relativos á actividade sindical do sector público autonómico, que concreta que hai 832 traballadores que traballan neste ámbito na administración xeral, sanidade e educación.
O custo total calculado pola Xunta é de 10,6 millóns, dos cales a meirande parte corresponden á administración xeral.