O vento en Galicia superou os 160 quilómetros nun día con menos choiva

Redacción

jueves, 17 de septiembre de 2015, 00:10

A Coruña amaneceu coverta de nubes e con refachos de vento

A segunda e última xornada da primeira cicloxénese explosiva do verán galego deixou refachos de vento, que superaron os 160 quilómetros por hora, acompañados dunha redución na cantidade de precipitacións. Este martes arrincou a cicloxénese explosiva con moito vento, gran ondada e abundante choiva, condicións que continuaron este mércores aínda que a auga, intensa por momentos, caeu en menor cantidade que hai vinte e catro horas.

As alertas laranxas e amarelas fixéronse notar cunhas condicións adversas que incluso superaron nalgúns puntos ás deste martes, segundo informaron fontes de Meteogalicia.

O refacho máximo de vento do sur o martes foi de 130 quilómetros por hora en Punta Candieira, en Cedeira, situada na zona norte da provincia da Coruña, cifra que este mércores aumentou ata os 140,8 km/h, mentres a dirección do vento cambiaba lixeiramente a suroeste.

E este dato non foi o máis alto, a estación de Lardeira, no municipio ourensán de Carballeda de Valdeorras, rexistrou a 1.620 metros de altitude un refacho de 161,6 quilómetros por hora. En Ourense tamén houbo importantes refachos na cabeza de Manzaneda, no termo municipal de Manzaneda, onde chegaron aos 114,8 quilómetros por hora.

No litoral coruñés as cifras máis altas estiveron en Lira (Carnota) con 111,6 km/h; na Gándara (Vimianzo) con 106,2 km/h; e en Malpica con 103 km/h. Destacan en Pontevedra os 137,9 km/h de vento rexistrados en Xesteiras (Cuntis) ou os 109,4 de Castro Vicaludo (Oia), mentres que a marca en Lugo estivo en Ancares (Cervantes), con 117 km/h a 1.364 metros de altitude.

Todo nun día cunhas temperaturas mínimas de trece graos centígrados, máximas de dezaoito e que promediaron uns quince graos ao longo da xeografía galega. A choiva, que este martes superou os cen litros por metro cadrado nalgúns puntos, estivo presente, pero en menor cantidade, e afectou principalmente ás provincias de Pontevedra e Ourense.

Ourense os bombeiros, retirando un arbol da rúa.

Na primeira foi a estación de Xesteiras a que máis precipitacións rexistrou, con 39 litros por metro cadrado, seguida de Pereira (Forcarei) con 35 e Fornelos de Montes, con 39,8. A cantidade máis alta rexistrada en Ourense foi de 34,4 litros por metro cadrado na Mezquita, case no límite coa provincia de Zamora, e o segundo número máis elevado foron os 32,6 litros por metro cadrado de Cabeza de Manzaneda.

PREVISIONS ATA O FIN DE SEMANA

Este xoves está previsto un día tranquilo, con nubes e claros acompañados de choivas ocasionais durante toda a xornada que darán paso a un fin de semana plácido con aumento das temperaturas.

O venres aínda continuarán as choivas eventuais, en especial no litoral da Coruña e Pontevedra, e o sábado e o domingo serán dous días, se as condicións non cambian, tranquilos e con sol para aproveitar as últimas xornadas do verán.

As alertas terminan este mércores e tampouco está programada ningunha para o resto da semana despois de dous días infestados de incidencias nos que os galegos tiveron que extremar as precaucións cada vez que saían á rúa.