O Encontro Nacional do BNG chama a "encher Galiza de Pontevedras a partir do 24 de maio"
domingo, 26 de abril de 2015, 00:02
O Pazo da Cultura quedou pequeno este sábado para acoller o Encontro Nacional do Bloque Nacionalista Galego-Asembleas Abertas, na primeira ocasión que este evento se desenrola lonxe de Santiago de Compostela.
Ante os candidatos nacionalistas aos municipios galegos, o voceiro nacional do BNG, Xavier Vence puxo como exemplo o modelo implantado na cidade de Lérez.
Vence recoñeceu no seu discurso que "queremos encher Galiza de Pontevedras a partir do 24 de maio", como aval co que o seu partido se presenta á cita coas urnas.
Polo escenario pasaron os candidatos das grandes cidades e doutros municipio galegos. Tamén o fixo o rexedor de Pontevedra, un Miguel Anxo Fernández Lores que apoia a receita do nacionalismo "ás duras e ás maduras".
Lores, para dar ánimos aos seus compañeiros de partido, finalizou a súa intervención recordando que "se fomos quen de triunfar nunha praza tan difícil como Pontevedra podemos facelo en calquera concello da nación".
O acto, coincidindo co 25 de abril, rendeu homenaxe á Revolución dos Caraveis portuguesa entregando unha flor a cada asistente e cantando a coro o "Grandola, Vila Morena".