A Xunta rexeita o concerto económico para Galicia e táchao de "pésimo negocio"

// @anaponton

O presidente da Xunta, Alberto Núñez Feijóo, rexeitou a proposta do BNG dun concerto económico para Galicia ao considerar que se trata de "un pésimo negocio" para a comunidade e advertiu que non supeditará a reformulación do financiamento autonómico "a discusións de bandeiras, sentimentos ou emocións".

Na sesión de control da Cámara, insistiu en que o financiamento non é unha cuestión "ideolóxica" senón de "persoas" e que así o exporá, para engadir que na discusión sobre a mesma defenderá "os intereses de Galicia" desde unha perspectiva de "diálogo" e "igualdade". Non en balde, proclamou que España "non é un país centralista".

"O centro de poder non está en Madrid nin en Barcelona, hai 18 centros de poder", aseverou, en relación ao Goberno central e as 17 autonomías. En fronte, a portavoz do BNG, Ana Pontón, lembroulle a súa última intervención en Cataluña e afeoulle que "vexa lóxico o concerto" para os cataláns, pero llo negue aos galegos.

Mañá preguntarei ás 10h a @FeijooGalicia que sinrazón xustifica que defenda o concerto económico para Cataluña e que o criminalice para Gz? pic.twitter.com/tZme8C9IdH

— Ana Pontón (@anaponton) 27 de diciembre de 2016

Pontón argumentou que o Estado recada "máis de 11.000 millóns de euros" en Galicia e que o que recibe a comunidade pola vía de financiamento "non supera os 7.000".

Feijóo instoulle a "escoitar completamente" a súa conferencia e insistiu en que "todos os economistas" sosteñen que un concerto económico prexudicaría a Galicia, sorprendido de que "nacionalistas intelixentes no século XXI" o poñan sobre a mesa. "Non me pida que faga pésimos negocios para Galicia, iso déixollo aos nacionalistas", espetou.