Os líderes políticos trasladan as súas condolencias polo accidente

Os líderes políticos dos principais partidos trasladaron as súas condolencias e pesar polo accidente de tren ocorrido este venres no Porriño  ao descarrilar o tren que facía o traxecto Vigo-O Porto e no que, polo menos, faleceron tres persoas.

Así mesmo,  as caravanas electorais de PPdeG, PSdeG, BNG, En Marea e Cidadáns quedaron canceladas para a xornada deste venres debido ao sinistro. Ademais, o vicepresidente da Xunta, Alfonso Rueda, suspendeu a súa presenza nun acto que tiña en Pontevedra como presidente do PP provincial para acudir ao lugar do accidente.

"O noso pésame ás familias dos falecidos. Esperanza para os feridos", manifestou o candidato do PPdeG e presidente da Xunta, Alberto Núñez Feijóo, a través da súa conta electoral de Twitter. "Preocupados polo accidente de tren no Porriño. Os equipos de emerxencias están a traballar na zona", dixo nunha primeira mensaxe.

Nuestro pésame a las familias de los fallecidos. Esperanza para los heridos. Suspendemos la jornada de campaña, de acuerdo con el @PSdeG

— Alberto Núñez Feijóo (@FeijooGalicia) 9 de septiembre de 2016

Tamén o candidato do PSdeG á Presidencia da Xunta, Xoaquín Fernández Leiceaga, trasladoulle as súas condolencias persoais e en nome de todos os socialistas galegos ás familias das vítimas do accidente ferroviario do Porriño.

O candidato socialista sinala, a través dun comunicado e tamén a través de Twitter, que tamén se puxo a disposición da alcaldesa do Porriño.

Seguindo con gran preocupación o sucedido no Porriño. Unha fonda aperta aos familiares das vítimas e feridos @PorrinoConcello @DeEgdelatorre

— Xoaquin F. Leiceaga (@XoaquiFLeiceaga) 9 de septiembre de 2016

MÁIS CONDOLENCIAS

"Miramos con preocupación para O Porriño. Queremos enviar todo o noso apoio ás vítimas e as súas familias, así como aos equipos de emerxencias", apuntou o candidato de En Marea, Luís Villares, a través da súa conta da mencionada rede social.

Dende @En_Marea suspendemos a xornada de campaña. Os nosos pensamentos están coas vítimas do accidente do Porriño e as súas familias.

— Luís Villares (@VillaresLuis) 9 de septiembre de 2016

Ana Pontón, candidata do BNG, tamén mostrou a súa "conmoción" polo sinistro de tren. "Todo o noso apoio e afecto neste momento tan duro", expresou, e agregou: "A dor compartida e a conmoción polo accidente de tren fan que hoxe gardemos silencio e esteamos coas vítimas".

Camiño do Porriño a acompañar as vìtimas e coñecer de primeira man a situación.

— Ana Pontón (@anaponton) 9 de septiembre de 2016

Así mesmo, a cabeza de cartel de Cidadáns, Cristina Losada, expresou a súa "dor e pésame" aos familiares das vítimas do accidente do Porriño e anunciou a suspensión da campaña.

Dolor y pésame a los familiares de las victimas del accidente de O Porriño. Suspendemos la jornada de campaña

— Cristina Losada (@christinalosada) 9 de septiembre de 2016

Os líderes do PP, Mariano Rajoy; PSOE, Pedro Sánchez; Podemos, Pablo Iglesias; e Ciudadanos, Albert Rivera, tamén trasladaron as súas condolencias ás vítimas do accidente de tren a través de Twitter, rede que utilizaron para publicar senllas mensaxes de pésame.

O presidente do Goberno en funcións asinou coas súas iniciais un 'tuit' no que expresou a súa "dor e tristeza" por este accidente, enviou o seu pésame ás familias dos falecidos e o seu desexo de "pronta recuperación" aos feridos.

Precisamente, o xefe do Executivo xa tiña previsto na súa axenda viaxar este sábado a Pontevedra para clausurar un acto do PP galego con motivo das eleccións nesta comunidade o próximo día 25.

Da mesma maneira, Sánchez deixou constancia da súa "tristeza polo accidente" na mesma rede social, onde trasladou o pésame dos socialistas ás familias das vítimas e o seu "desexo de pronta recuperación" aos feridos.

SÁNCHEZ PIDE QUE SE ESCLAREZA O ACCIDENTE

Así o fixo tamén ao iniciar a súa intervención na Escola Internacional de Verán de UGT, en Gijón, onde comezou reiterando as súas condolencias. Pero, ademais, deixou constancia do seu "desexo de que se esclarezan ata o último dos extremos" que deron lugar a este sinistro, que custou a vida de, polo momento, catro persoas.

O líder de Podemos asegurou tamén en Twitter que permanece "atento ao accidente de tren" e, tras pedir "precaución", explicou que está "a esperar a coñecer máis detalles".

Finalmente, o presidente de Ciudadanos indicou tamén que os membros do seu partido están "preocupados e pendentes das noticias sobre o accidente de tren en Pontevedra". "O meu pésame para as familias", escribiu Rivera.

UNIVERSIDADES

As tres universidades galegas gardaron este venres un minuto de silencio polos falecidos e feridos no accidente ferroviario acaecido esta mañá no municipio pontevedrés do Porriño. En concreto, fixérono antes de proceder á apertura do curso académico 2016-2017, que se celebrou no Pazo de Fonseca e que contou coa presenza dos tres reitores e o conselleiro de Cultura, Educación e Ordenación Universitaria, Román Rodríguez, entre outras autoridades.

Deste xeito, antes de iniciar o acto, o conselleiro de Educación solicitou aos presentes gardar un minuto de silencio polos falecidos e feridos no accidente ferroviario, que, de momento, saldouse con catro vítimas mortais.

Nesta liña, o titular do departamento de Educación sumouse á "dor" das familias dos falecidos e feridos, ademais de trasladar o "apoio" e as "condolencias" de todos os presentes no acto.

Así mesmo, desculpou a ausencia do presidente do Parlamento galego, Miguel Santalices, quen se trasladou ao lugar do accidente ferroviario.

No acto tamén participaron os reitores das tres universidades galegas; o alcalde de Santiago, Martiño Noriega; o profesor universitario e candidato do PSdeG á Presidencia da Xunta, Xoaquín Fernández Leiceaga; e o arcebispo de Santiago, Julián Barrio, entre outros.