Industria tumba unha axuda a Teo por incluír na solicitude un informe en galego

Rafael Sisto, alcalde de Teo. / Fonte: twitter @anovateo

O Concello de Teo (A Coruña) denunciou que o Instituto para a Diversificación da Enerxía e o Aforro (IDEA), dependente do Ministerio de Industria, denegou a concesión dun préstamo por valor de 3,27 millóns de euros para un proxecto de iluminación pública porque nos documentos presentados na solicitude incluíase un informe escrito en galego.

O alcalde de Teo, Rafael Sisto, cualificou de "falta de respecto" a actitude do IDAE e esixiu a dimisión do seu director xeral, Arturo Fernández, e do seu presidente, Alberto Nadal, por "empregar as institucións públicas para iniciar unha guerra política".

O consistorio de Teo, localidade situada nas inmediacións de Santiago, recibiu a mediados do mes de xuño a desestimación da petición dun préstamo a interese cero para renovar a iluminación pública porque "un dos múltiples documentos" que achegaron estaba escrito en lingua galega e nas bases da convocatoria establecíase que o idioma empregado debía ser o castelán.

Ante esta situación, o consistorio teense --no que goberna Son de Teo-Anova en coalición co PSdeG-- presentou unha alegación asegurando que se trataba dun "defecto emendable" e incluía unha tradución do dito documento ao castelán. Ademais, engadían que as bases "en ningún caso fixan que a utilización dun idioma cooficial do Estado sexa razón de desestimación definitiva".

O pasado día 11 de xullo, o Concello de Teo recibiu a resposta do IDAE, no que volven tumbar a solicitude porque o consistorio "ignorou" as bases da convocatoria, unha cuestión que, como reproduce nunha nota de prensa o concello, "non pode entenderse como un comportamento que responda a unha dúbida razoable do solicitante" senón como "unha resistencia á observación de tal previsión".

"ACTITUDE FALTONA"

O alcalde de Teo, Rafael Sisto, trasladou o "enfado" da corporación municipal pola actitude "faltona" da institución dependente de Industria, que mesmo, segundo o rexedor, nunha conversa telefónica con responsables do instituto chegaron a dicirlle que "nin os cataláns farían iso".

Neste sentido, Sisto avanzou que pelexarán "ata o final" no ámbito administrativos e tamén presentarán unha moción no pleno municipal para "rexeitar a actuación dos responsables do IDEA" e, deste xeito, facer ver que non se trata dunha postura "só nacionalista".

Ademais, pedirán unha entrevista co conselleiro de Cultura, Educación e Ordenación

Universitaria para trasladarlle a situación e non descartan realizar "accións conxuntas con outros concellos". En relación a isto, avanzou que coñecen que outros gobernos locais da comarca tamén se atopan na mesma situación, pero aínda non recibiron resposta á alegación por parte do IDAE porque o Concello de Teo "tiña máis avanzados os trámites".

DOCUMENTACIÓN EXTENSA

Sisto reiterou que os dirixentes do IDAE utilizan como "escusa" o idioma para emprender unha "guerra política" e móstrase sorprendido con que o uso do galego sexa un "defecto non emendable". "Se faltase a metade do informe seguro que sería emendable", espetou.

Así mesmo, engadiu que o informe non admitido polo IDAE "son dúas páxinas, na súa maior parte números" que forma parte dunha documentación moito máis grande e complexa "desde o punto de vista técnico".