​Aparecen decenas de vacas mortas ou esfameadas nunha granxa de Chantada

Axentes do Seprona atópanse investigando ao propietario dunha explotación gandeira situada en Chantada, na que apareceron unha 40 vacas mortas e varias máis vivas pero nun estado "lamentable e esfameado".

Cando se desprazaron ata a granxa investigada, os axentes puideron comprobar "as pésimas condicións sanitarias e estruturais que presentan as instalacións, onde no momento da inspección atoparon 20 bovinos nun estado físico lamentable, presentando aspecto esfameado e extrema delgadez, con feridas abertas en todo o corpo".

Tamén advertiron "un espesor de abono que supera os 50 centímetros, observando restos de esqueletos e cadáveres de animais que se foron descompoñendo" ata quedar enterrados.

Os axentes tamén atoparon diferentes sacos cheos de "restos óseos e putrefactos de cadáveres mesturados con restos de abono". Xa no exterior das instalacións con aínda máis cadáveres "en diferentes estados de descomposicióne catro bovinos máis amarrados a unha estrutura metálica, "con signos de desnutrición, feridas e co corpo cuberto dos seus propios excrementos".

Tras comprobar os feitos, procedeuse á inmovilización da explotación gandeira e á investigación do titular da gandería como presunto autor dun presunto delito relativo á protección dos animais domésticos (malos tratos animais), co resultado de polo menos 40 animais bovinos mortos e 24 con signos de desnutrición.