Citroën negociará axustes vinculados ao novo modelo

A directiva de PSA Peugeot Citroën acaba de comezar a negociar cos sindicatos, trasladándolle a necesidade de adoptar medidas asociadas á candidatura da planta para optar a un novo modelo.

En principio, a empresa asegura que as medidas necesarias non incluirán axustes no salario dos traballadores. O voceiro de UXT, Rubén Pérez, explicou que a idea da empresa é reorganizar o traballo na factoría, adaptando as instalacións e os traballadores para a posible adxudicación dun novo modelo, un vehículo que se produciría en exclusiva mundial. 

Se finalmente Vigo consegue a adxudicación do novo modelo, o seu volume de produción aumentaría notablemente, algo que requeriría cambios na actual dinámica de traballo e medidas de flexibilidade. 

As medidas serán negociadas nunha mesa, na que estarán presentes unha ducia de representantes dos traballadores: 7 do SIT, 2 de UXT, 1 de CUT e 1 de CIG. 

Santiago García, de CC.OO. avanzou que a empresa está disposta a aceptar a aplicación dun Expediente de Regulación de Emprego de carácter extintivo para os traballadores "veteranos", aínda que aínda non se falou de requisitos. "Trátase dunha vella reivindicación dos sindicatos", recalcou.

A ese respecto, o portavoz da CIG, Manuel Domínguez, advertiu de que esa "saída" de veteranos non debe estar condicionada por ningunha outra actuación, xa que se trata de operarios que teñen "loitada, suada e ben merecida" unha "xubilación digna".

Mentres, o responsable da CUT, Vítor Mariño, expresou a súa desconfianza por se a chegada dun novo vehículo implica que se "sobrecargue" ao actual persoal, en lugar de habilitar outra quenda. Así, lembrou que, na actualidade, "os que teñen bolsa de horas teñen que traballar obrigatoriamente os sábados" e advertiu de que "non é o camiño" obrigar "a todos" a traballar en fin de semana.